|
edward
|
Posted -
2003/6/10 下午 07:31:01
|
|
|
Ant. ad introitum
Si vis perfectus esse, vade, vende quae habes et da pauperibus, et veni, sequere me, dicit Dominus. (Mt 19, 21)
Collecta
Pater sancte, qui, licet fideles omnes ad perfectionem caritatis invitas, multos tamen excitare non desinis, ad Filii tui vestigia pressius sequenda, concede, ut, quos tibi in sortem peculiarem elegeris, conversatione sua valeant regni tui signum ostendere Ecclesiae mundoque perspicuum. Per Dominum.
Vel, a sacerdote religioso dicenda:
Familiam tuam, quaesumus, Domine, propitius respice et nova prole semper amplifica, ut, et filios suos ad propositam caritatis perfectionem adducere, et ad hominum salutem efficaciter valeat laborare. Per Dominum.
Super oblata
Munera quae tibi offerimus, Pater sancte, suscipe miseratus, et omnibus, qui Filium tuum per arctam viam imitari laeta sibi mente proponunt, communionem concede fraternam et spiritalem libertatem. Per Christum.
Ant. ad communionem
Amen dico vobis, quod vos qui reliquistis omnia, et secuti estis me, centuplum accipietis et vitam aeternam possidebitis, dicit Dominus. (Cf Mt 19, 27-29)
Post communionem
Famulos tuos, Domine, spiritali cibo potuque confirma, ut, evangelicae semper vocationi fideles, vivam ubique Filii tui imaginem repraesentent. Qui vivit et regnat in saecula saeculorum.
Vel, a sacerdote religioso dicenda:
Huius, Domine, virtute sacramenti, da nobis, quaesumus, perseverantem in tua voluntate famulatum, ut tuam caritatem mundo testari et bona quae sola non amittuntur valeamus fortiter inquirere. Per Christum.
|
